貼地敢言！邵仲衡！

呢次訪問絕對、絕對係筆者一次EQ大考驗，因為本來已經預備咗好多關於《大時代》嘅問題，但訪問咗5分鐘，呢位 “哥仔” 忽然話：“我講呢啲嘢比你寫無問題，但係我之前做咗超過200個訪問都係類似問題，比呢啲行貨資料你，讀者都唔願意睇喇，諗下有乜新嘢問好過喇！” 有請一開始訪問就嚇死筆者－ZA誌藝人專訪主角－邵仲衡！

與時並進唔怕out

諗深一層又係喎，如果我係讀者，睇一篇文章嘅資料、內容全部都可以喺網上搵到，仲駛乜鬼睇ZA誌？上網已經得喇，係咪先！今次絕對可以比大家了解到一個 “新鮮、貼地” 嘅邵仲衡喇！

一套重播嘅《大時代》令邵仲衡有幾熱爆就唔講喇 (其實筆者好想講)，不如就由佢自己講下呢排做咗啲乜先：“呢次復出至現在大概九個月時間，已經做咗一大堆喺我身上比較新鮮嘅嘢，例如舞台劇、拍廣告、拍咗一套運用新拍攝手法同意念嘅劇集《瑪嘉烈與大偉》、幫音樂人－迪子拍咗 《舌尖有毒》 MV、還有跟譚小環一齊拍嘅《獅子山下》，亦出奇地喺新年黃金檔期再同李麗珍 (珍妺) 再度合作，拍攝葉念琛大受歡迎嘅電影《紀念日》等等，以上全部都好好玩，好有意思嘅事，仲可以睇到不一樣嘅 ‘邵仲衡’，如果今時今日仲要做啲我唔開心嘅嘢，我會好憎我自己，而今次復出只會選擇自己中意嘅工作！＂

訪問期間 “與時並進” 這四個字不斷出現，正正因為邵仲衡離開咗娛樂圈一段長時間，所以佢可以清楚感受到上世紀嘅拍攝手法同而家有乜唔同，而睇返佢復出之後嘅工作，足以證明娛樂圈需要更多創新嘅思維！佢補充：“人，唔可以永遠停留喺同一地方，尤其藝人，必須要承認網上世代先係未來嘅主流，我敢講！你返到屋企係開wi-fi先，而唔係開電視先，電視撈飯年代已經過去！某程度上要明白與時並進，藝人演繹方法、拍攝方法、剪接方法都應該比啲唔同嘅嘢觀眾。”

雖然邵仲衡曾做過室內設計、賽車手及改裝汽車的生意，但佢十分明確一件事，如果獲邀請出席嘅工作關於演戲，期望觀眾認同 “邵仲衡” 係一位藝人，唔想用演員身份去回答室內設計或賽車手嘅問題，對於佢嚟講，如果藝人身份被混淆係好大嘅問題。

“膠野”！No Way─選擇工作係皇道

面對今時今日五花百門嘅資訊平台，邵仲衡點樣去選擇工作？他很老實講：“其實今次復出，做藝人感覺已經同以前好唔一樣，就以同粉絲溝通為例，以前想要同偶像傾計簡直難過登天，但而家只要喺Facebook send個message比我或留言就可以，同佢地距離拉近咗，溝通多咗，自自然會知道觀眾想要啲乜嘢。我個Facebook 有九十後大學生、已投身社會工作嘅夫婦、年紀比較大的都有，普遍係高學歴，佢地都唔希望邵仲衡做 ‘膠’ 嘢！所以如果太主流、無新意嘅工作我唔會接。＂

邵仲衡很強調工作首要條件係 “故事嘅質地”，簡單啲講就係夠唔夠創新、吸唔吸引、好唔好玩，例如商場邀請出席活動要求唱歌，他話一定唔會答應，因為如果要唱歌二十年前當紅時候已經可以做，今次一定唔會純粹為錢去工作，要做，就做新鮮嘢。例如係最近演出的舞台劇──《火鳳燎原－亂世英雄》，大家可以見到邵仲衡拋開 “靚仔” 樣，飾演一個造型污糟、會求饒不一樣嘅古代英雄──呂布，而觀眾對這 “新” 形象嘅呂布非常受落。邵仲衡講：“因為導演想玩到好盡，我一定會配合，唔會介意對手係邊個，咁先過癮，以前無辦法，無癮都要做，而家可以選擇，作多方面嘗試。＂

直至今時今日，廣告對邵仲衡嚟講係一個金錢世界之外，仲係一個仍然有好多要學習同成長嘅地方，無可否認，傳統電視廣告已受到網上媒體極大嘅衝擊。邵仲衡分析：“而家好多老闆已經首選Facebook 、YouTube等呢類網上媒體落廣告，價錢唔係最緊要，重要係可以將產品滲入更深嘅層面，接觸到更多人，所以我地可以透過網絡去到更遠，咁點解仲要迷戀以前嘅模式？我都要與時並進，動下腦筋，選擇唔同種類型工作，比啲新鮮嘢大家。＂

跨越世代之爭

好簡單嘅問題，例如用慣傳統電話突然要轉用智能電話，點都要一段時間適應，究竟點去迎合新嘅拍攝手法以及同娛樂圈新鮮人相處？邵仲衡不畏言：“其實之前排練舞台劇《火鳳燎原－亂世英雄》超過五六十次，過程中好明顯同新鮮人有 ‘世代之爭’，佢地唔係好明我做緊乜，例如我做戲，正式拍攝自自然然就已經可以令導演滿意，排練時間我睇落好似唔專心，仲會間唔中講下笑，新鮮人會覺得我唔認真，但係其實我已經諗好角色點演，反而佢地排練當中突然休息十五分鐘，自己人圍埋講笑佢地又覺得無問題，咁又算唔算唔專心呢？呢類世代之爭喺我復出這九個月以來經常遇到。＂

不過，呢種世代之爭對邵仲衡嚟講都係較輕易解決，雖然曾經離開娛樂圈一段日子，但一直緊貼社會節奏，清楚明白新世代年輕人嘅工作模式 ，令佢可用最短時間投入新世代嘅娛樂圈，例如知道上鏡外型要清減啲所以減少少磅；要以演員角度去思考及觀察身邊人和事，吸收真實市民嘅動態，因為將來如要演一位普通市民，都可以用得到曾觀察過的表情動作，而成熟嘅心理狀態也令佢無一種 “大佬” 架子，反而係會揾機會幫忙後輩。但邵仲衡都老老實實講：“之前的確唔係咁適應，但我唔會即時講出口，因為我自己都知道要喺娛樂圈打滾就要去適應。例如其實我已經有老花，戴眼鏡睇遠嘢無問題，但近嘢就唔清楚，有一次排戲，導演改咗劇本，大家要攞住劇本喺台上排練走位，我當時睇唔清楚劇本，有個新世代演員同我講：‘你盲架！’ 我心諗我真係因為劇本太近而睇唔到，不過會原諒佢亦無現場鬧佢，因為佢將來都會老，哈哈哈！＂

邵仲衡比筆者嘅感覺，可以用 “饑餓” 兩個字嚟形容，當然唔喺食物、而喺演戲方面！咁多年演出嘅經驗、咁多作品，竟然無一個角色令佢完全滿意。佢話：“演員必須要不斷嘗試，尤其我自己好鐘意喺新嘗試入面尋找快樂，如果工作上無創作空間就無樂趣。除此以外，新世代好唔明白，其實一套成功嘅作品係要道具、燈光、配角、主角及一大班人合作嘅効果先會好，並唔可能只靠1、2個人就可以。”

而邵仲衡喺社會上打滾咁多年，好清楚自己嘅位置，知道年紀漸大，唔可以永遠都係演靚仔小生，所以不斷求變、不斷向多方面嘗試。“好似《瑪嘉烈與大衞》對我嚟講絕對新鮮，最起碼大衛呢個角色可以比我好好發揮，如果我仲用二十年前嘅演技，感覺會好差，反而用自己舊有嘅經驗再加入新元素，効果有目共睹，令工作變得有趣係首要條件！＂

生於亂世，公道要捍衛

可以有如此跟上新世代的想法，唔怪得喺有線節目──娛樂怪談中得到《九十後網民最喜愛男藝人》，上世紀已經出道嘅藝人竟然取悅到九十後年輕人，可以講六十後至九十後都有邵仲衡嘅粉絲，原因好簡單，就係夠 “貼地”。而原來佢夠 “貼地” 嘅原因，正正係做生意嘅時候，遇到好多唔同嘅人，見盡人生百態，而遇上不公平嘅事情佢會出聲。佢解釋：“我離開娛樂圈之後有二十年時間做生意，每日就切切實實做一個普通市民，不論客人、朋友或員工每日都講到社會上發生緊嘅事，自己亦遇過唔公平嘅情況，所以我好清楚生活係點。我學識唔好任何事都講出口，有啲嘢你幾唔中意都唔可以講，但太過熱衷又係唔啱，有時唔中意可以選擇唔出聲，例如你叫我去讚一樣我唔認同嘅事，我覺得好 “膠”，我一定唔會做，會選擇收聲！”

不過，邵仲衡強調：“我切記一件事，就係 ‘公道事情要捍衛’！我會用我自己嘅方式去捍衛，而唔係要取悅其他人，我遇過太多不公平事，所以我喺網上見到有不公平事情我會係Facebook 分享比大家，來個理性嘅討論，有啲事情一定要爭取，藝人嘅角色唔止淨係賺錢之後返屋企瞓覺，我希望用自己嘅知名度將自己嘅經驗傳承比新世代，做事要有意義，以生命影響生命係藝人其中一個使命。＂

將來嘅邵仲衡

單單九個月邵仲衡已嘗試咗咁多新類型工作，那未來又如何？“將來嘅計畫必定係再仔細咁選擇工作，希望可以有更大創作空間、有好 ‘質地’ 嘅故事，同埋搵到啲我自己未試過嘅工作，例如造型比 《舌尖有毒》、呂布更爆的”！而佢更拍心口應承大家：“邵仲衡唔會做 ‘膠’ 嘢，雖然好多時要配合班底或故事，或者未必能夠成功，但一定會盡力為大家帶出新鮮嘅邵仲衡！” 所以，喜歡邵仲衡嘅朋友或讀者可以去佢facebook留言、比啲意見睇下邵仲衡可以做出乜野新嘗試喇！

後記

驚險萬分嘅訪問，聽咗咁多邵仲衡嘅人生經驗，筆者也有所領悟，今次呢篇文章為咗要配合 “新鮮” 嘅主題，首次以全口語化形式去完成，咁先夠 “貼地” 嘛！

唔知讀者們有無留意文章入面，用咗好多 “邵仲衡” 三個字？其實本來想以 “大佬孝” 或 “孝哥” 作稱呼，但係訪問一開始大家都已經知道要 “與時並進”，連佢自己都不斷講邵仲衡乜、邵仲衡物，可以感覺到邵仲衡想大家集中焦點喺全新既 “邵仲衡”，大家可以繼續欣賞丁孝蟹，但要記住邵仲衡喺未來仲有更多更爆嘅角色，所以筆者都要收起任性──乖乖咁等待更爆嘅 “邵仲衡”！

採訪：Ken Ho, Diana, 伯頓
撰文：Ken Ho
攝影：Tim’s photography
設計：Victoria

場地鳴謝 : 葡多利
禮品贊助 : 宅木 及 皮竇