你身邊有一個男仔，總是覺得他的舉動似是對你有意，但有時又覺得他好似對每個女孩子都是咁好，到底他有沒有在暗示「你比較特別」的訊號？？Pheromone 就話你知，如果一個男仔對你有意思，佢會透過咩行為表達，咁你就可以知道自己有冇收錯信號。
無野搵野講
一個男仔周不時問你「有咩做」、「做緊咩」、「好悶」之類的說話，都幾肯定對你有意思，只係佢說話技巧未去到咁高，只能用這類沒有內容的說話引你注意。你懷疑佢真係悶所以搵你？絕對係，但重點係佢悶的時候會想起你，就證明你係佢心見中係有地位的。
乜都比你揀先
假如你們是屬於一個大群體，例如同事或同學，經常會一齊聚會，可以留意他有沒有以你為先。例如派手信時比你揀先或者送給你的手信寧舍不同，叫下午茶時第一個問你想食乜或總是記得你的喜好，佢負責接送大家時，總是為你留了前座，或者刻意最後才送你回家，好讓你們多一點獨處時間。這類細眉細眼的行動，都在展現出他的細心。
故意透露自己的行蹤
他有沒有故意讓你知道他今天去了哪裡？試想想，即使你親口向他問他去了哪裡，他的答案都可以是「剛才在忙」、「有事做緊」、「唔得閒」等等，但如果他詳細地讓你知道他的日程行蹤，甚至乎跟誰吃飯都告訴你，其實他對你是十分坦白，願意讓一個唔係女朋友身份的女仔知道自己去向，是一個非常大的暗示。當然，如果你是透過社交媒體得悉就另當別論，上面講的係他私訊你。
介紹他的家人及朋友給你認識
如果行到這一步就相當明顯了，畢竟帶你出席朋友聚會或跟家人見面，某程度上就是身份肯定的一種。一般會做這個行為的原因，都是想家人朋友給一點意見，覺得這個女仔好唔好，適唔適合自己之類。如果已經發生係你身上，恭喜你，中獎機會已經去到99%。
當然，上面的行為他可能不只對你一個咁做，但其實你完全唔需要擔心，畢竟「人天生根本都不可以愛死身邊的一個」，如果你對他都是有意思，與其花時間觀察他的行為，不如採取主動，愛情唔多唔少都有賭博的成分，正所謂「不愛下去怎麼會知」。
Pheromone 語錄:「與其一直猜疑對方心思，不如主動表達自己所想。」
Pheromone理性面，感性底。不愛讀書，愛文字。忠言逆耳，廢話少講。突破盲腸，點出真相。
雖說男追女隔重山，女追男隔重紗。講到咁易，係做女仔既都係要有返少少矜持，唔好比人覺得咁隨便，之但係男歡女愛乃屬平常事，如何比對方知我對佢特別好呢？所以今次篇文章就係比各位巴打們睇下，當一個女仔對你有意時，會有邊D行為啦。
注意！她出沒
她總會唔覺意咁出現係你既身邊，無論早上吃早餐、又或無聊逛咖啡店、打波既時候、又或者朋友聚會上總有她的影子，務求令你對她產生印象，然後講聲「嘜咁啱既」的廣告對白，温馨得嚟又記憶猶深，若果最後都無法在一起，至少曾經刻意的偶遇也令人回味。
即時回覆訊息及Tag你
無論係IG、FB、WeChat朋友圈的發文，當你留言時她一定會詳細解釋再加上很多表情符號，務必要令你覺得她很細心解答，非常友善，也會透過網絡的公開平台見到喜歡的東西Tag你或者Inbox你，讓你知道她對你特別不一樣。
打電話叫你起床
各位巴打，千萬不要少看這個舉動，青老師敢肯定若果有女仔願意打電話叫你起身，百分之一千對你有意，試諗下，晨早流流，在夢鄉之陣，有把女聲召喚你起床，哇！佢一定對你有意思，要好好珍惜啊！
過時過節關心你
過時過節的訊息問候，唔係copy人地既圖轉發出去，而係誠心地獻上祝福給你，特別情人節呢D重大日子，女仔喜歡周圍送朱古力給男仔，若果唯獨你個份係親手整的朱古力九乘九非常重視你。訊息又會問下「放假有咩做吖？」、「估唔到冇人約你喎？」、「情人節都冇人陪吖？」這些對話都係想暗示比你知，好想你約佢出去，如果巴打們有意別遲疑吖。
青老師語錄：「用心感動一個人，對方一定會知道的。」
青老師鍾意男人，更鍾意留意男人，鍾意望下男女之間既互動；會睇AV唔會扮低B，少少咸扑扑脆，咪以為女人寫兩性代表隨便任性，期待文章與你有共鳴。
* 每個人都必定經歷戀愛關係，無論是苦是甜，都是一堂課一個經歷，都是成長的調味料。如果你的感情問題不知如何抉擇，或想跟我們分享你的故事，都可以寄信來 [email protected]。Pheromone 及青老師會嘗試給你一些提示。
