食物選擇足以改變地球?慢食,給人的第一個印象就係 “慢慢食” 的意思?非也,原來佢係同“快餐”打對台,Slow Food VS Fast Food。

Z:ZA誌

A:澳門慢食文化協會副會長兼創辦成員Ann Leong

Z:可否介紹一下慢食係一個咩嘅概念?

A:其實慢食嘅概念係1989年由意大利開始,創辦人係當時一位叫Carlo Petrini嘅記者,目的係為咗抵抗麥當奴進駐羅馬,也擔心年輕一輩對食物的來源已越來越漠視,所以就提出咗一個與 “Fast Food” “快餐” 相反嘅概念,亦即係 “Slow Food” “慢食"。

希望透過提出慢食概念,讓大家關注我哋對每一種食物嘅選擇其實係對地球帶來很大嘅變化。全球一體化係好多層面,例如經濟方面可能係一件好事,但飲食文化嘅一體化在很多的角度則弊大於利,部分食物過量消耗會造成食物多樣性嘅不平衡,也使部分飲食文化消失於全球化中。

Z:睇番資料,自1989年開始有第一個慢食協會,世界各地嘅慢食協會相繼成立,其實慢食同早已流行嘅有機種植或者公平貿易係什麼嘅關係,又有咩唔同?

A:有機種植或者公平貿易其實都屬於慢食文化概念嘅一個部分,而慢食係一個更大範圍和系統化嘅概念,由食物如何種出來、運輸、出售、到我們的手裡,而我們又如何選擇食物等。總括嚟講,慢食提倡以下三大元素:

1) Good,即人類選擇好嘅食物和對地球健康有益嘅食物;

2) Clean,減少食物嘅化學品或添加物,保持食物原有嘅味道;

3) Fair,也就是公平貿易,減少中間謀取暴利環節和把食物真實一面呈現給消費者。

事實上,每兩年國際慢食協會都攪一個大會,邀請全球所有分會參加,同期舉行一個超大規模嘅食品展覽,並邀請全球的食品供應商參加,為咗支持非洲等發展中國家嘅農夫/食品生產者參加,大會提供免費機票同住宿,藉此提供一個平台俾消費者同食品生產者直接聯繫,減少中間嘅成本,這亦是慢食文化體現公平貿易所採取嘅方法。我自己曾參加過一次,十分深刻難忘,除咗係因為那個大得3日3夜也行不完的場館外,係我有機會試到其他國家如非洲很多不同嘅食品同香料,更重要係我見到佢哋一拿上手便十分清楚知道食物嘅好與壞,這其實應是人類原始嘅能力。

Z:澳門慢食文化協會嘅成立背景係點?睇番資料中國而家成立咗4個慢食協會,包括北京、上海、香港同澳門,睇嚟澳門嘅步伐都唔慢,但你哋覺得現時係澳門推廣慢食有沒有甚麼困難?發展嘅空間如何?

A:慢食文化協會現時已遍佈全球150多個國家,已有1,300多個慢食分會創立,會員人數超過10萬,而我哋澳門係中國4個分會中最早成立嘅一個。發起人 (澳門慢食文化協會會長) 係澳門旅遊學院 (IFT) 一位講師,一位係香港居住多年嘅比利時人,很早便了解慢食文化嘅概念。於2007年,佢首次透過教學將慢食嘅概念帶嚟澳門,做法係給一班二年級嘅學生一個統籌活動嘅機會,讓大家了解乜野係慢食文化,而我亦都係透過這個活動了解到慢食嘅意義,就係咁聚集咗一班志趣相投嘅人係2010年成立澳門慢食文化協會。

而係澳門推動慢食其實係一件唔容易嘅事情,因為澳門太城市化,我哋沒有食物生產者,難以做到慢食中維護生物多樣性和食品質量那一關,所以我哋集中係教學同推廣方面,透過唔同嘅活動同途徑推廣慢食文化。另外,我哋亦都希望同北京等其他分會合作,北京那邊有食物嘅生產者,可以從食物源頭做起,我哋希望透過各個分會的合作,從源頭以至推廣的過程中在生活的社區內宣揚慢食文化。

Z:見到你哋協會曾攪過唔少工作坊同活動,有哪一個係你印象最深刻或覺得最成功?嚟緊會有一些什麼的活動推廣慢食概念?

A:我哋主要係有2個方向,一方面係每年IFT學生幫忙做嘅2個活動,已經成為一種傳統,另一方面就係我哋會員攪嘅約8個活動。係咁多活動中,我自己最印象深刻係連續2年攪嘅中山摘士多啤梨團,我哋挑選採用最少化學品嘅果園,將城市人帶回農田。係出發嘅途中我哋講解士多啤梨嘅知識作為教學,係果園採摘俾參加者有親身體驗,返嚟還能將士多啤梨製成果醬,讓大家從源頭直至製成品的過程對食物有更進一步嘅了解,例如我哋發現原來青綠色嘅士多啤梨唔一定係酸架。

Z:除咗非“快餐”外,我哋點樣先可以了解到買番嚟嘅材料或食物屬於慢食?

A:同歐洲或者其他較早期開始推動慢食文化嘅地區相比,係澳門要知道哪些食物係慢食會有一點難度,因為例如係歐洲,慢食文化協會係社區已經有一定程度嘅滲透,甚至屬於國際慢食協會開設嘅大學 (University of Gastronomic Sciences),提供食物文化相關嘅專業學位課程,使不同階層嘅人都了解到基本選擇食物嘅要點。

雖然係咁,係澳門我哋亦都可以為慢食盡一分力,慢食其中一個很重要嘅目標就係保護自己嘅飲食文化,例如我哋見到上兩代亞爺亞嫲可以食到嘅食物,我哋應該盡力保留延續,重視傳統嘅食物,而唔係全世界都只係食某幾種食物。

而我哋係IFT攪嘅其中一個活動就係 “taste education”,讓大家了解到當大眾口味變得單一化時後果會係好嚴重,亦都要了解選取食物時不一定只選擇外地嘅食物,例如大家都好鍾意食嘅三文魚,佢嘅生長速度遠遠追唔上我哋捕食嘅速度,令到三文魚數量大減,相反,食用其他成長速度較快的魚類(如沙甸魚),對生態系統嘅影響就會較低,所以食物選取嘅平衡係好重要。

而我哋嚟緊準備推出一本關於優質餐廳嘅書在澳門各地點免費派發,介紹澳門哪些餐廳食肆符合慢食文化,當中不一定全為中國菜或本土特色嘅餐廳,只要佢係支持該國的傳統飲食文化,同時配合慢食文化嘅理念,都會係入選之列。

Z:啱啱講起異國飲食文化,係日本菜當中,大家都知道味精(MSG)已經公認成為佢哋嘅食物文化之一,咁係日本嘅慢食文化係咪都會有所保留?

A:慢食文化最緊要嘅其中一點係選取嘅食物對人體及地球生態冇害,味精作為調味料如果用少量係冇問題,問題係大量嘅添加,所以頭先講起嘅taste education亦都會教大家如何去選取對自己有益嘅食物,這亦都係澳門這樣高度城市化嘅地方我哋所努力嘅方向。因為依家好多時買番嚟嘅食物已經過加工,甚至係面目全非,可能將來有一日我哋嘅下一代已經唔知道 “雞” 原來係有頭有腳,以為只係 “一舊舊”,透過taste education我哋希望可以俾大家甚至下一代知道甚麼係 “好”  嘅食物和食物嘅 “原始面貌”。

註:如果大家都有興趣更深入了解慢食概念或者加入澳門慢食文化協會,可以瀏覽佢哋Facebook Page  (Macau Slow Food Association) 或者上國際慢食協會登記做中國區澳門分會嘅會員:http://www.slowfood.com/

最後修改日期: 2022 年 9 月 22 日