他來自火星？她來自金星？男女之間充滿了不同甚至有極端的想法，男有男講女有女講，會是矛盾連連或是火花四濺？全新專欄「他與她的左右手」，與大家暢談男女熱話。
近日，因為周永恆呢位被封賤男嘅歌手係訪談節目的爆粗言行再離場，賤男一詞又再度廣泛流傳。講真，青老師都有睇過段片，周永恆的行為當然有失禮儀啦～但係主持人咄咄迫人的訪談態度，就好比一個醫生不斷向有狂躁症的病人作出挑釁行為，等於係傷口上曬鹽，淋蜜糖再放螞蟻的道理一樣，有失專業操守。
係青老師心目中所謂賤男都係食女玩女，要女養埋，仲打女人，又賭又毒又借錢咁樣樣，但係前幾天同友人HAPPY HOUR之際，我問她：「你覺得咩係賤男？」 友人竟然說出：「食得靚咪叫風流，食得樣衰咪叫賤男，最終目的嘜又係一樣」，二秒後，青老師哈哈大笑。。。甚有哲學性又中POINT。
好似澳門猛人華哥咁，相信各位讀者對於華哥都不感陌生了，與眾多女星傳緋聞或真搭上，到老婆主動提離婚呢兩、三年間出現嘅女，青老師真的十隻手指也數不完，讀者有沒有發現一個重點？華哥的花心程度比坊間的賤男係花足幾條街有多，但係青老師從未係聽過一個跟過華哥的女人講過佢係賤男。（啪啪啪啪手聲），華哥你真係好了解女人既需要，好犀利！呢ｄ叫真風流真心讚。難怪連社交網站都有你嘅粉絲專頁。
所以撇除食得靚嘅風流男人外，用賤男形容男人好比用港女形容女人一樣，即係，上網識其他女，一分賤男；同其他女瞹眛，五分賤；腳踏兩船，十分賤？？NO～青老師覺得實在不太不公平了！爛船都有三分釘，取其之長補己之短，自己又係咪咁好嘅女人呢？同埋你未必知道佢係咪一位真賤男。因為待你好，未必一世待你好；待你差，未必一世都待你差，可能更差。
又點解賤男咁賤仍然咁多女鍾意？青老師反方向諗，點解乖男人咁乖又未必多女鍾意呢？最大分別就係氹女技巧，前者知道女人在生氣時到底嬲甚麼？又或者知道女人要點樣氹，鍾意聽咩說話；同埋有一句說話叫物以類聚，一個願打一個願捱。唔好唔記得，你係可以選擇走嫁。。。
青老師
鍾意男人，更鍾意留意男人，鍾意望下男女之間既互動；會睇AV唔會扮低B，少少咸扑扑脆，咪以為女人寫兩性代表隨便任性，期待文章與你有共鳴。
賤男，相信不用再解釋，簡單來說就是情場騙子。Pheromone想講，賤男是如何練成的？青老師都講，賤男離不開食女玩女，要女養，打女人，唔俾錢等賤格行為 (通常俾錢玩女人的，都俗稱雞蟲)，留意到嗎，其實賤男的育成關鍵是要有一個女人，一個蠢女人。
有好多女人會呻，點解呢個世界咁多賤男？Pheromone想講唔係呢個世界有好多賤男，是你吸引到好多賤男埋身，或者你的性格育成這班賤男。唔好扯火住，聽我講埋先，我聽過很多例子，明知賤男有另一半，都要「鐘」個頭埋去，然後還要說個賤男好慘，同老婆已經無曬感情，個老婆唔肯離婚之類，拖一兩年真係算好彩，我聽過有些仔都幫人生埋，個仔七歲都仲等緊賤男離婚。其實會遇上賤男的女人，性格上係有某幾樣共通點。
樣靚，但沒有自信心。很多女孩子有光鮮的外表，但自信心不足，以致她們需要異性的讚美，增強自信心。她們會輕易相信甜言蜜語，如果唔係又點會講得出「佢同老婆已經無曬感情」。要一個男人說句「我最愛的其實是你」有幾難，但問題是你要懂得分辨他是否真心，追女不外乎是車出車入、送小禮物、請食飯這類小動作，還有很多門面功夫可以做，但其實這些都不是長久的，真正愛你的人，會在乎你的日常生活，關心你內心的想法，至少，他不會明知你不開心都置之不理吧。
另一種特質就是缺乏安全感，需要不停的愛肯定自己的存在價值，這類女仔可能不停換男朋友，但卻很少穩定交往的，俾人感覺「成日換仔」。賤男的特質，就是同一時間有多段關係，而你的特質就剛好吸引到賤男的磁場，反正他也不是想要一段穩定長久的關係，啱曬啦。記住，吸引力法則大家都聽過下吧，「你是甚麼樣的人，就吸引甚麼樣的人。」
有些女仔可能家庭背景導致愛情觀有些少扭曲，但其實這些都不是錯，只是個性上的某上缺失。雖然Pheromon講賤男的育成關鍵是蠢女人，但錯的始終是賤男，是騙徒，女人都是受害者。各位女讀者，不想遇到賤男就要分辨他們說話的真偽，俾個意見大家，想知道他有幾愛你，要看他的行為，而不是聽他的說話，時間可以驗證一切。
Pheromone
理性面，感性底。不愛讀書，愛文字。忠言逆耳，廢話少講。突破盲腸，點出真相
