隱世小店 —— 叁拾壹堂高烤吐司

多種因素令香港物價愈來愈高，就連食一份三文治都要幾十蚊。香港有好多唔同嘅冰室，茶餐廳，但近年無論係特別定係舊式嘅都被連鎖茶餐廳取代。小編好鍾意食三文治、多士等包食，特別係台式三文治，每次去台灣都一定會搵特色三文治食。今次小編同大家介紹嘅就係以三文治為主嘅「叁拾壹堂高烤吐司」。

開業一段時間嘅「叁拾壹堂高烤吐司」位於油麻地德昌里小巷，近果欄。跟住 Google map 行都要搵，就好似一間隱世小店咁。舖頭面積唔大，只有幾個坐位，以木為主嘅裝修感覺似去咗日本或台灣嘅地道小店。牆上掛滿唔同嘅標語，就好似一種提示。令客人來到，睇到牆上的字句，感覺就好似提醒客人記得「喜樂」、「感恩」、「慈愛」等等。

叁拾壹堂高烤吐司提供多款港式口味多士三文治，全部都係即叫即製。最特別係有港式燒味的三文治，將香港特口味色融入。價錢亦好親民貼地，廿幾蚊一份三文治，仲可以另加埋薯條飲品。小編揀咗兩款三文治，叉燒煎蛋吐司同埋蒜香雞扒蛋吐司配套餐。燒味飯食得多，但配成吐司都係第一次，估唔到呢個組合又幾特別。蒜香雞扒蛋吐司，雞扒香嫩，配埋特色醬汁真係好好味。套餐配嘅薯條都唔失禮，又香又脆，唔太油亦唔會太淋。