宅木家品傢俱 “木”“納”的生活體驗

編按：近年澳門出現咗好多賣家居用品嘅舖頭，最近係美副將一條鮮為人知嘅小巷入面，開咗一間賣木器為主嘅家品傢俱店，究竟呢間舖頭有咩咁特別？點樣吸引到人捐窿捐罅搵呢間舖頭？今期就專訪兩位老闆，Dave同Nicky。

記：你哋間舖叫做宅木(ZAWOOD)，其實係咪有咩特別意思？

N：我哋首先係諗中文名，“宅”係室內嘅意思，“木”係因為我哋間舖主要係賣木制品，木製品係呢間舖嘅靈魂，所以叫“宅木”，而ZAWOOD就係中文名的諧音。

記：其實你哋之前唔係從事家品傢具嘅生意，點解會開呢類型嘅舖頭？

D：由我太爺直到我父親開始一直都係做木匠，由細到大係“木堆”中成長，所以我對木都有一種親切感，有一種情意結，父親退休後我就決定延續做同木有關嘅工作。

記：咁其實現家澳門都有好多家品傢俱嘅舖頭，宅木(ZAWOOD)點樣可以係芸芸舖頭中脫穎而出，受到大家嘅注意？

D：相比於其他傢俱材料，木係一種有機嘅物質，唔似其他物質咁係一些死物，運用化學方法將佢整埋一齊，而木本身代表一種生命力，亦都係原始的一種傢俱材料，從古至今大部分的傢俱都係由木製造，所以木同人之間有一種自然的親和感。而且木俾人一種溫暖同自然的感覺，好適合用係傢俬到。

N：而我哋嘅傢俱主要係走簡約，懷舊(Vintage)同原始(Raw)的風格，但又實用為主，適合蝸居需要充足嘅收納空間，係澳門的家品傢俱店比較少見到，較為適合年輕又或追求結合環保同時尚相嘅消費群，俾到大家不一樣嘅選擇。

記：咁你哋舖頭唔係商業區，地方比較隱蔽，係一條橫巷入面，咁點解你哋會揀係呢度開舖？

D：其實我哋唔係商業旅遊區，而係橫街窄巷開舖，係因為我哋想選擇一個屬於澳門地地道道嘅地方創業，係真正嘅“澳門街”，而唔係只係得連鎖店嘅大街馬路，可以俾人一種休閒舒適又親切嘅購物感覺。

N：而且呢區其實都屬於澳門嘅文化創意區，隔離有牛房藝術創意區同LMA澳門樂隊嘅集中地，好多文化創作人士都係呢區活動，切合我哋本身希望開呢間家品傢俱店唔單止係一門生意，仲可以對澳門嘅文化創意產業有少少推動。

記：咁你哋對宅木(ZAWOOD)有什麼期望同目標？

D：我哋希望創造澳門自家家居用品同傢俬嘅品牌，當人哋睇到ZAWOOD 就會聯想起澳門，諗起澳門除咗賭場出名之外仲有創意實用的傢俱用品。雖然而家賣嘅貨大部分係“現成”訂番嚟為主，但我哋諗住由小做起，除咗自家製明信片，已開始自創收納盒，甚至已完成了幾樣大件的傢俱；希望往後日子可以創作更多自家製長櫈、餐枱，甚至係床同衣櫃，等每個人都可以感受到木製傢俱用品自然樸實嘅氣息。

Zawood (宅木)

電話: +853 2851 9394
電郵: [email protected]
網站：www.zawood.com
營業時間：11:00am~7:30pm (逢星期二休息)

[google_map location_id=”24476″/]

澳門美上校圍16號，美副新邨第2座地下AN
Av. do Coronel Mesquita No.16 R/C Mei Fu Sun Chuen, Macau

攝影: 森