係澳門,除咗踢波打藍球游水等 “大路” 運動外,其實仲有好多係外地已流行多年,但澳門就一直寂寂無名,好似滑板同BMX呢類被歸入X-Game嘅極限運動,連帶想買相關用品都要過香港。今期我哋就上半山(望德堂聖味基街),睇下開業剛一週年,澳門第一間賣滑板同BMX產品“ROLL” 點樣由零開始躍動。

Z:Za誌    R:ROLL

Z:你哋呢間舖頭叫 “ROLL” 係有乜特別嘅意思,滑板同BMX兩者有咩元素令佢哋融合係一間舖頭到?
R:由於 “ROLL” 主要係以售賣BMX同滑板產品為主嘅舖頭,而呢兩項運動都係要用碌(即 “輪” )才可以滑行,有繼續行唔好停落嚟,即英文Rolling嘅意思,咁我哋攪舖頭有得 “撈” 好緊要嘛!加上考慮到現實上一間舖頭只賣一種產品比較單調,佢哋兩者其實又係屬於同一種類別嘅運動,所以就將佢哋結合一齊。

 

Z:好多人攪舖頭都有一些目標同信念,你哋攪 “ROLL” 有冇咩特別嘅目標同信念?
R:當然,攪生意一定希望可以糊口,除咗現實需求外,我哋攪“ROLL”嘅一個重要目標係希望滑板同BMX等係澳門所謂 “冷門” 嘅運動能夠有更加多人參與和更加受到重視,令呢類運動係澳門可以普及些。

 

Z:係澳門,平時比較少聽人講起BMX同滑板呢類街頭運動,咁澳門人對佢哋嘅睇法或接受程度同其他地區係咪有好大差別?
R:係!事實上我哋認為有些澳門人係這方面係有點無知,滑板這項運動唔係新鮮嘅事物,但我哋就聽過不少人講話 “澳門有人玩滑板咩? ” 以我哋所知20年前澳門已經有人玩滑板同BMX,當時係香山公園仲有一個唔正規但設計俾滑板同BMX嘅場,而係其他地方早就有不少人玩,但係澳門就有好多人完全唔了解呢項運動,而係2007年嘅亞洲室內運動會也有包括滑板同BMX嘅X Game比賽,可能因為好新鮮冇接觸過,當時都有唔少嘅觀眾去睇,我哋希望可以將呢兩項運動係澳門推廣。

3 

Z:咁你哋點解會俾滑板同BMX吸引而會有開舖頭嘅想法?
R:其實我哋早係8/90年代已經對呢兩項運動有所認識,亦都參與過,但好慚愧我哋不約而同都冇繼續練習而相繼發展咗另外一D興趣,可能或多或少因為以前係澳門冇一間專門賣呢類型產品嘅鋪頭,當時已經心想希望他朝有日有個有心人可以係澳門開店,唔駛我哋過香港先買到想要嘅嘢。

因為對滑板呢樣運動始終有個情義結,近年決定無論如何都要重拾小時候呢項夢想運動,即使從頭學起都好,因為始終自己係真心鐘意嘅野;加上前幾年我認識到香港滑板界一位元老級人物,佢係98年便係香港開咗第一間滑板用品專門店,當時我估計玩滑板呢項運動嘅澳門人應該都係幫襯佢,而香港亦都由零個專俾滑板同BMX玩嘅場地增加至現家超過10個,但我同時眼見澳門冇乜人玩滑板或者BMX,感覺呢樣運動沒落咗,而鄰近地區反而越來越活躍,推廣也愈做愈好,佢嘅經驗係一個好大嘅啟發,我哋希望澳門亦都可以“由冇變有”。係各方面因素嘅配合下,上年終於開左“ROLL”,一完多年嚟嘅心願。

403497_4327197544936_1373139400_n

 

Z:BMX同一般單車有D咩唔同?呢D唔同會唔會係你哋對BMX情有獨鐘嘅原因?
R:簡單講BMX即係小輪車,其實已經唔係咩新產品,好多6/70年代嘅朋友都見過甚至接觸過,體積相比其他一般單車屬較小的類型,亦因為咁令佢成為X-game裡面被廣泛採用嘅車款,基本上現家一講起BMX就等同你係玩X-game/花式,而BMX本身亦有分好幾種玩法,由於係所謂極限運動,同佢有關嘅所有野亦成為吸引我地嘅主要原因之一。

 

Z:澳門呢幾年經濟暢旺,很多年輕人都嘗試創業,你哋係呢個過程中遇到嘅最大難題係咩?
R:最主要係澳門這個市場對BMX同滑板嘅接受同支持程度,我哋舖頭主要賣嘅唔係必須品,係鍾意呢項運動嘅人先會買。雖然周邊產品好似衫同鞋某程度上更受歡迎,但我哋希望大家唔係單純因為覺得款式有型有格便買,而係鍾意呢種運動了解到佢哋嘅功能而買,而我哋亦都定位 “ROLL” 係一間集合俾滑板同BMX愛好者嘅零售、聚腳同後勤支援嘅舖頭。

 

Z:你哋對 “ROLL” 有咩發展嘅期望?
R:當然期望可以一直做落去,持續推廣令更多人參與呢類運動,至小令其他地方嘅人知道澳門係有滑板同BMX,唔係淨係得賭場。

ROLLSHOP MACAO
電話+853 6359 8420
www.facebook.com/rollshopmacao
澳門荷蘭園大馬路30D通發大廈地下H座

 

分享
上一篇文章快樂與痛苦
下一篇文章假日的逃離
為澳門本土一本免費網上雜誌,志在集結一班澳門創作人士從他們眼中介紹澳門鮮為人知的一面及發表屬於澳門人創作的文章或感想,給澳門朋友多一個網上瀏覽好去處,並讓香港、中國大陸以至所有華文地區人士了解澳門,發掘澳門另一種風味!