通常講起夾Band,在大家腦海中係咪即刻浮現一班十幾廿歲嘅後生仔係度玩緊如雷貫耳嘅音樂,原來係澳門有一隊Band已經有成廿年歷史,成員仲係橫跨兩代(二十出頭至知命之年),佢哋嘅音樂係點樣呢?點解可以由那些年嘅黃毛小子夾Band到依家中壯熟男?

 

Vibration簡介:Vibration成軍於1995年,為本澳門長青搖滾樂隊之一,成員包括主音及結他手Ringo、結他手阿John、低音結他手金名、鼓手Machi及Keyboard手Rico

Z:你哋幾個係點樣走埋一齊組Band?Vibration個名係點嚟?

V:係90年代初我哋幾個本身係唔認識的,各玩唔同嘅樂器,因為那時澳門樂壇嘅圈子好細,好多時每一次夾Band都要搵唔同嘅人先 “齊腳” ,所以次次都會係唔同人,後來偶然嘅機會係個show到大家認識咗,咁啱大家玩嘅樂器唔同,湊合就成為一隊Band,就係咁1995年Vibration 正式成立。

 

Vibration解震動,聲音需要透過空氣震動才能傳播,有聲音才能產生音樂,所以我哋希望通過我哋嘅 “震動”(聲音)傳播音樂,令聽者有所共鳴。

 

Z:咁Vibration嘅音樂路向係?

V:最初成立嘅時候我哋沒有特定嘅音樂路向,如果講音樂類型係POP加ROCK,反而我哋係想透過音樂傳達一些訊息,通過我哋嘅能力(音樂)讓大家對夾Band有真正嘅認識。尤其係我哋初組成嘅年代,夾Band很多時俾人標籤為不正當嘅活動,所以我哋想俾大家知道夾Band其實係一個十分正面嘅嗜好,通過音樂可以適當宣泄情緒,而近幾年我哋亦都會透過歌曲反映一些社會現象,諷刺時弊,表達對事物的懷念或感慨等,同埋希望令夾Band嘅歌曲都係可以 “唱俾屋企人聽” 。

 

Z:我知道Vibration中間有一段時間暫停咗,係因為什麼原因,又係咩原因大家決定重組Vibration?

V:我哋現家嘅成員組合已經係第三代。係大約2000年嘅時候因為大家各有各忙,而我哋玩音樂係為咗 “尋開心” ,以 “為樂(快樂)而玩樂(音樂) ” 作宗旨,所以大家有共識暫停咗一段時間,為生活而忙碌。但其實大家都有一種 “心癮” ,希望可以重組Vibration,其間大家亦曾參與其他樂隊組合。直到2006年我哋現家其中一位成員(金名)攪咗一場表演邀請Vibration( “Vibration融和友愛木結他音樂會” )出場,而中間亦都參與一些小型音樂會,我哋便正式 “重組復出” ,並有新嘅成員加入,2009年開始便一直係現時嘅陣容。

Z:玩咗Band咁多年,除咗唱別人嘅歌外也有一些創作,現時你哋有幾多首原創作品?當中邊一首係你哋最鍾意或最有感覺的?

V:原創歌曲有10首,其中最鍾意係〈Angel Smile〉,首歌係唱俾下一代聽,我哋亦都好樂意同大家分享呢首歌,呢首歌可以話訂立咗我哋唱歌嘅一個路向──給年輕人帶來正面嘅價值觀。

 

Z:我哋知道你哋出過好多大大小小嘅Band Show,邊一次印象最深刻呢?

V:2011年3月攪嘅Mini Rock Inn,佢係我哋嘅小型專場,亦都係成立至今嘅一個小小總結,係呢次活動上文哥Ringo仲同女兒同場演出,展現夾Band其實係可以兩代人同時去做嘅事情,係一項開心健康嘅親子活動添!

Z:眼見香港樂壇Band Sound重現(Mr、Rubber Band、Color等),你哋覺得澳門Band有機會發展嗎?你哋對澳門樂壇有咩睇法?

V:現時澳門Band壇可以話百花齊放,有不少年青人主動走出來組Band,也有女仔參與,並擁有自己嘅作品。因為資訊科技嘅發達,透過網絡可以將自己嘅音樂俾全世界人知道,多了宣傳嘅途徑,而學習音樂如錄音mixing等嘅機會也比以前多好多。整個樂壇參與嘅人層面廣泛咗不少,亦都更為普及,以前澳門樂壇某一段時期就只係某一個年齡段嘅人玩Band,但現家樂壇老中青輩都有,係一個健康同正面嘅發展方向。

 

另外,可能因為澳門經濟好轉,多咗商業性的吸引力,商業機構嘅邀請多咗,有較多嘅演出機會。另外,以前除咗少數幾個社團攪Band Show同埋政府嘅一些支持外,就只可以靠Band自己尋找演出機會,現家多咗一些音樂團體嘅推動,而政府嘅資助也提高了不少,機會同支持嘅力量多元咗。

Z:頭先你哋講過一些Vibration 嘅長遠方向同目標,咁短期嘅目標又係什麼?

V:依家正籌備推出大碟,作為我哋音樂歷程嘅一個記錄,亦係我哋創作嘅一個總結。因為係出碟嘅關係,會好細緻聽到效果,比平時現場夾Band嘅要求更高,係提升和自我認知(如有哪些缺點和不足)嘅過程。

 

Z:最後,Vibration可以話係澳門Band嘅前輩,有咩可以寄語後浪呢?

V:我哋認為最緊要唔怕衰,勇於嘗試,亦都要有較大的包容性和把目光放遠些,不單着眼自己樂隊嘅得失而忽略澳門Band壇整體,又或忠於自己嘅音樂而排斥其他。現時看到澳門Band壇比較共融,大家相互協作,沒分你我,希望能一直保持咁樣嘅氣氛。

bandroom

後記:筆者本身對音樂認識唔深,更遑論去睇Band Show,而且一直也有一種感覺,就係Band嘅音樂都係比較吵耳,同自己style唔係好夾,而且都係年輕人嘅天下,不過今次採訪後有幸現場聽到Vibration演唱〈Angel Smile〉,發覺原來Band Sound係可以好多元,包容性很大,而且玩Band並唔係年輕人嘅專利,人生唔同嘅階段可以展現唔同嘅Band Sound,而一隊Band當中中青兩輩一齊可能會有更耀眼嘅火花呢!

 

分享
上一篇文章夏日
下一篇文章樹上的臉
為澳門本土一本免費網上雜誌,志在集結一班澳門創作人士從他們眼中介紹澳門鮮為人知的一面及發表屬於澳門人創作的文章或感想,給澳門朋友多一個網上瀏覽好去處,並讓香港、中國大陸以至所有華文地區人士了解澳門,發掘澳門另一種風味!