有無諗過,有律師行文職唔做,去做廚師呢?我帶住呢個疑問,走入一本新派日式料理外賣店,同Putchiee de Sousa展開一場有關夢想的對話。

 

“2005年,我一個人帶住八佰英鎊去倫敦求學,為左生計,係表哥介紹下,去左佢打工既Geisha Contemporary Japanese Cuisine做天婦羅師傅。呢間餐廳好特別,集酒吧、的士高同日本餐於一身;菜式方面係走法國、意大利及日本菜的fusion路線,令當時既我大開眼界。我就係咁入左行,仲係呢間餐廳遇到事業上的伯樂 ── Anthony Francis de Sousa Tam。佢係總廚,又係澳門人,幫過好多大餐廳開業,我從佢身上學到好多野!”

 

“後來,我只係做咗四個月,間餐廳就被人收購咗。但呢份經歷令我有更廣闊的思維,同時熟練咗煲飯同炸天婦羅的技巧,也奠定我現在壽司創作的基礎。”

 

“失業後,為咗生活,我連外賣仔都做過。輾轉間我去咗一間港式餐廳Four Regions Chinese Restaurant 做打雜,當時我練到刀功、燒烤、管理等技能。做左一年之後,我又去咗另一間日本餐廳Kombu Japanese Restaurant做Sous Chef,即係大廚既助手。由於間餐廳開係展覽館旁邊,平日好少人會專程過嚟,所以我好想諗辦法,吸引更多顧客。於是Anthony就提意我參加比賽,希望可以令餐廳增加曝光率。我便努力研究咗一個叫枝豆海膽cappuccino的菜式,係好似咖啡甘飲的。但大廚卻誤會我想出峰頭,吾俾我出賽,所以我只好失望甘離開。”

 

聽到呢度,我就更好奇點解Putchiee仲會堅持去追夢呢?

 

“係!當時我好失望,但命運卻帶咗另一個機會俾我。港式餐廳既老板咁啱打算開日本餐廳,於是就搵番我。呢間Maki Contemporary Japanese Cuisine既總廚係個有名氣既日本師傅,佢由德國既總店過來;我跟佢學到劏魚的刀法以及做壽司的技巧,連現在我常用的各種醬汁都係當時學到的。在總廚離開後,馬拉籍大廚降左我去洗碗。我好唔忿氣!為咗證明自己既實力以及提升功夫,我用咗三年時間全程投入練廚藝,一有空便會參考不同的烹飪書及去其他餐廳做兼職,增廣見聞。結果憑著呢份毅力,升到二廚。期間日籍總廚仲搵我過德國幫手咗十二日, 係壽司創作既技巧上有所得著。所以我付出既努力係無白費既!”

 

或者機會真係預留俾有準備既人,所以Putchiee既堅持,引領佢不斷朝著成功進發。

 

前後五年浪落他鄉,由於思鄉病發,Putchiee決定係2010年尾返澳門,再度同表哥合作,係氹仔既橘子(Yuzu Contemporary Japanese Cuisine)做兼職二廚,了解澳門的飲食環境。一年後,由於爸爸身體出問題,Putchiee唯有停工,照顧爸爸。

 

直至2012年三月既某一日,佢既一班好朋友睇準咗賭廳既外賣市場,便搵Putchiee合作,令佢再燃起對創作壽司既決心。於是開設一本新派日式料理外賣店既構想就係咁誕生咗啦!

 

畢竟要實現心中夢想並不容易,就算前路荊棘滿途,尋夢的人也得闖過去。

 

“係啊,開外賣店,係圓我創作夢既第一步!我希望透過呢間外賣店,更了解澳門人既口味,直至有另一個既機會,我一定會開一間有特色的日式主題餐廳。”

 

“由開業至今,我所創作既壽司得到好好既反應,包括主打的香辣脆脆卷,係我2009年係英國時諗到既; 一本炸蝦卷及一本鰻魚卷等都是按顧客的口味而創作出來,當中鰻魚卷的芝士仲係我自己mix出來的。得到顧客的讚賞,幾辛苦也值得。”

 

當Putchiee談論著佢種種的經歷,我完全地感受到佢既毅力,為實踐理想所付出的一切,試問有幾多人可以為夢想,不斷地堅持著呢?

 

“係呢度我都好多謝澳門旅遊學院Retail and Marketing Business Project specializing in Social Media Marketing學科教授Dr. Fernando Lourenço呢位老友。佢搵左一本合作,為學生提供左一次良好的實戰機會,分別以不同的網路渠道宣傳一本,包括:facebook, weibo, youtube及instagram。呢一個為期三個月的project,令學生加深左對日本餐廳經營及運作的知識,也使一本獲得更多有效的數據,達致一定的宣傳作用。”

 

係傾偈既過程中,令我打破左對所謂廚房佬的一貫形象,可能這就是Putchiee所講外國人會對廚師的尊重,因為他們都會很用心去了解顧客的需要,從而改良及創新菜式。或許,這是步入成功的必要元素。

 

有人話,做人如果無夢想,就同鹹魚一樣!咁吾知睇完呢篇訪問既您,又點樣睇您自己既夢想呢?係小小既澳門,又有幾多大夢想係度蓄勢待發呢?希望下一次有機會聽到你既夢想故事!

 

一本新派日式料理 外賣店

澳門飛良韶街10A舖

外送電話:6330 7788

https://www.facebook.com/ypmacau

 

分享
上一篇文章Day 077
下一篇文章土耳其熱氣球之旅
為澳門本土一本免費網上雜誌,志在集結一班澳門創作人士從他們眼中介紹澳門鮮為人知的一面及發表屬於澳門人創作的文章或感想,給澳門朋友多一個網上瀏覽好去處,並讓香港、中國大陸以至所有華文地區人士了解澳門,發掘澳門另一種風味!