近年澳門不同嘅教育機構、政府部門、社團等開設各式各樣嘅課程,有啲可能係你我都冇諗過係澳門可以報讀,又或者覺得遙不可及。當中,大家有冇諗過參加一個課程可以一嚐拍電影嘅滋味。

 

2012年7月,90多位參加者報讀了由望德堂區創意產業促進會、瘋堂十號創意園、生產力暨科技轉移中心合辦,業餘進修中心協辦嘅 “馬交影藝新思維專業課程”,乍聽名字已覺得是非一般嘅課程,而結業嘅微電影製作功課更可能是 “不可能的任務”。今次專訪我哋訪問咗3位來自不同背景嘅學員,分享一下如何完成拍攝這部畢業習作,仲有對電影拍攝感興趣的年輕人對澳門這方面發展前景嘅睇法。

 

首先介紹一下三位受訪對象嘅背景,導演Puzzle係讀設計,畢業後係某大賭場做motion graphic,後來有機會到香港從事廣告業,最近回流澳門創業。另一位叫亞華,係攝影助手同負責道具,從事出版業,對電影拍攝沒有甚麼頭緒,在好奇心驅動下報讀這課程。最後一位叫Qinnie,係副導演兼剪接,大學讀設計,畢業後一直從事動畫 (animation) 的工作。佢哋3位連同另外3位共6人,係各自原來互不相識嘅情形下,各司其職,完作佢哋首部微電影 “Bitter Sweet”。

 

P:Puzzle

W:華

Q:Qinnie

Z:ZA誌

 

Z:Puzzle,你可以話係6位成員當中最有拍攝嘅經驗,其實拍微電影同你以往參與過拍攝嘅MV、廣告最大嘅分別係咩?你對拍電影又係點樣產生興趣而令你報讀這課程?

P:我諗佢哋最大嘅差異係劇本同複雜性,電影劇本更注重劇情嘅考慮,而且需要更好控制時間同埋兼顧瑣碎嘅事情。而我其實一直都很喜歡動畫,後來係朋友同上司嘅影響漸漸鍾意睇戲,也令我愛上拍片,想拍一套劇情片。

Z:睇番資料,呢個課程圍繞教授電影同戲劇嘅知識技巧,執教的唔少係香港嘅星級電影人或演藝人士,但到實際操作肯定遇到唔少問題,主要又會係咩?

P:課程方面除咗專業知識同技術嘅教授外,係拍攝方面也提供了部分器材同一定嘅資金。但因為分組同主要工作角色係課程安排,我哋幾位本身又完全唔識,所以開頭要花較長嘅時間磨合。

W:不過對於我本身對電影拍攝冇乜認識嘅人嚟講,幾個星期六日的課程可以話係 “鷄精班” ,很多未必聽得明,就靠拍攝過程中不斷摸索。而係我哋這組6個人當中,有3位就好似我咁全無經驗。

Q:另外,雖然本身有一些資金嘅提供,但當正式開拍嘅時候總想做好些做好些,預算也就超出唔少。

 

Z:咁當初劇本同選角係點樣完成,還有那些場景道具?

P:其實基本都係由零開始,我哋上完堂之後大家一齊諗劇本,而因為資源所限,劇情唔可能天馬行空,後來認識一位朋友開咖啡店,所以就地取材借用那場地,而大家商量後覺得以黑咖啡為題材也比較新鮮。

Q:前後由構思到拍攝完成用咗3個月,正式拍攝超過72個小時,最後拍出嚟嘅微電影其實也較預期長,約27分鐘。

W:選角同道具可謂係全組人 “晒馬” 咁搵,大家將所有朋友網絡都用盡,借到就借,角色方面其實除咗導演Puzzle我哋個個都粉墨登場,主要嘅4個角色亦都係係朋友網絡物識同挑選返嚟。

Z:其實一直以來香港甚至海外一些電影都會用澳門做題材或者嚟澳門攞景,但係澳門拍電影嘅人好似唔多,近年港澳或者華語世界流行短片同微電影,你覺得呢個係咪澳門電影人或者對拍電影有興趣者嘅發展方向?你哋點睇澳門係呢方面嘅前景?

Q:我覺得微電影係電影初學者一個很好嘅起步點,因為拍電影需控制或者兼顧嘅事情好多,需要累積一定嘅經驗先操控到,多拍幾部微電影掌握了之後就可以嘗試一般嘅電影。

P:而且因為微電影篇幅較短,比較容易吸引大家嘅注意,可以利用網上嘅發佈平台分享出去,俾多啲人認識。

近年政府都有資助唔少有志之士拍短片或者電影,而我哋亦知道澳門其實有唔少電影拍攝中,不過可能因為版權嘅問題或者欠缺合適嘅平台,所以唔係好多人知。例如每年嘅 “澳門國際電影及錄像展” 也有 “澳門製造” 嘅環節,透過比賽俾唔同程度嘅電影或短片拍攝愛好者嘅作品可以登上舞台,不過很多時這就只有這一次嘅播放機會,之後就……而且可能因為澳門市場細,欠缺拍攝嘅支援,例如係香港有專門嘅公司租借器材,但係澳門就要靠自己買或者借齊所有裝備,這或多或少都影響劇本係創作上要 “就住” ,例如選多啲室內景,室外景亦避免係夜晚拍攝等。

Q:雖然依家比以前多咗參與嘅平台,不過其實都係好有限,而且各種資源都係比較缺乏,澳門亦都比其他國家地區起步慢咗唔少。不過亦都見到越嚟越多有心人係呢方面發展,陸續拍緊唔少澳門人嘅作品。

Z:咁你哋最終都完成這部畢業習作,有咩特別嘅感想或體會?

Q:我其實以前都參與過一啲影片拍攝嘅工作,不過都係同相識嘅朋友,今次係由完全陌生的狀態下慢慢認識、合作,而且大家來自五湖四海,未必有呢方面嘅經驗,不過大家互相補足,熱愛拍攝,最終都順利完成。

W:可以簡單講成件事對我嚟講係 “好新鮮,好好玩”,想繼續學多啲關於電影拍攝嘅知識,係一個難忘嘅經驗。

P:今次係第一次自己拍片做導演,除咗要控制同解決拍攝上各方面嘅問題,仲要控制好大家嘅人際關係,據我所知有一組就係因為呢個原因最後冇拍得成。另外,因為大家都有全職工作,夾時間方面其實唔容易,加上問朋友借用場地,要係開舖前拍完,所以其中有一日係連續拍攝36個鐘,但當時大家都眾志成城,唔覺得攰,最大嘅滿足係我哋由原來劇本也沒有,至最終擁有我哋嘅成果。

後記:雖然暫時未知佢哋嘅畢業習作幾時出街,且因為版權問題未能供諸同好,但有興趣嘅讀者也可瀏覽佢哋嘅拍攝花絮,Facebook同故事簡介,期待冇幾耐有更多澳門人,特別係年輕人嘅作品面世。

 

Bitter Sweet

 

黎逸朗和康保怡是青梅竹馬的好朋友,

兩人合力開了一家精品咖啡店,

希望這家咖啡店能帶給顧客最簡單、最原始的黑咖啡,

可惜黑咖啡的魅力仍然未能廣泛推介給顧客。

 

女學生Molly本來不愛喝咖啡,

受到兩人影響,漸漸懂得欣賞這神秘的黑咖啡。

 

某一天,熟客KC來到咖啡店,

誠邀康保怡到自己的新公司擔任咖啡顧問,

無意中被黎逸朗和Molly知道了。

 

本來單純的黑咖啡,

會否受到外來的奶或糖而影響了本質?

還是”咖啡豆”最愛的仍然是 “水” 呢?

the-interview

 

分享
上一篇文章遇上困難了...... 我真的不想放棄!
下一篇文章Dizzy@@
為澳門本土一本免費網上雜誌,志在集結一班澳門創作人士從他們眼中介紹澳門鮮為人知的一面及發表屬於澳門人創作的文章或感想,給澳門朋友多一個網上瀏覽好去處,並讓香港、中國大陸以至所有華文地區人士了解澳門,發掘澳門另一種風味!