三國鼎立──澳門三大戲院大比拼

疫情前,澳門電影院可以說是一間獨大,只要朋友話去睇戲,大家都默認係去UA,明白既,場次選擇多,有爆谷汽水,仲可以在酒店消磨一個下午,的確是週未好選擇。但係最近半年,產生了一點變化,2021年12月葡京人的英皇戲院,以及星晧廣場的CGV戲院相繼開幕。令澳門的戲院格局變成三強鼎立,至今開業半年,兩間新戲院的運作都已穩定,服務質素亦漸上軌道,皇子就帶大家走一趟,看看各間戲院既優缺點。

圖1_CGV

 

地理位置

CGV > UA > 英皇

原來三間戲院都位於離島區,就唔就腳有時都好影響戲院的選擇。皇子住在氹仔市中心,由星晧廣場公佈將設有戲院就一直在期待,直到CGV開幕,已成為皇子睇戲的首選,步行只需5分鐘,就算是花城區的朋友,相信10分鐘左右都可以抵達,相比起必須開車的UA或英皇,皇子覺得CGV已經贏了一大截。而英皇的位置就比UA更差,葡京人比澳門蛋還要入幾個街口,相信只有路環區的朋友覺得葡京人比較近。

 

 

座位舒適度

UA > CGV > 英皇

睇一場戲起碼都個半鐘,甚至超過兩小時,萬一座位唔舒服真係好難頂 (相信這也是大會堂及永樂被比下去的主因)。曾經,觀光塔是皇子認為最舒適的戲院,當然UA的開幕後就改變了,UA座椅真的有一種厚實和軟熟的舒適感,而手枕也是同一種質感及設計,而且手枕寬度十足,就算同時使用都唔會出現「手肘撞手肘」的情況。CGV的座椅相對少了軟熟感,而且皮椅較硬身,但整體的還算闊落,唔會有侷促感。英皇戲院的座椅我認為最差的,座椅相對較短,但連皇子的大腿都不能完全承載 (皇子的腿已經好短),簡單來說就是不舒適。

 

影院設備

英皇 > CGV > UA

英皇戲院内設9間影院提供約1,200個座位。同時設有全澳首個IMAX® with Laser銀幕,闊近23米,高近12米,配備IMAX新一代放映系統,亦有「MX4D動感特效影院」。

CGV星皓廣場戲院設有5個放映廳,包括全澳首間4DX 及Sphere X特效廳,共提供736個座位,另設VIP Lounge貴賓室。

相較之下,開幕超過10年的UA就沒有任何優勢可言,這一環節優勝的當然就係有IMAX的英皇,年底上影的阿凡達2,終於唔需要過香港睇啦。

圖5_CGV

 

配套設施

CGV > UA > 英皇

無論一家大小,或情侶去睇戲,都總會包埋食飯或行街的一連串活動,所以戲院的周邊配套都會是考慮因素之一。座落星晧廣場的CGV盡顯優勢,星晧廣場除了有IKEA亦有不少食肆選擇,酸菜魚、中餐、廢水、日本菜住君選擇,想食平民一點仲有個FOODCOURT,同時又有大型超市,真係好適合一家大小。銀河的UA可謂不相伯仲,食肆選擇多不在話下,仲有大量名店及酒店配套,有時5小時免費泊車都未必夠。

此方面英皇可以話係輸足9條街,葡京人開業至今仍未有一間食肆或商店令皇子印象深刻,每次去英皇睇戲,都係去其他地方覓食,亦唔會作任何的逗留。

 

小結

皇子簡單從上面4個方面去比拼,當然唔可以完全判定各間戲院既優勝劣敗。例如有人覺得UA個爆谷特別好食,為咗爆谷而去,英皇戲院亦有其特別之處,例如重播王家衛既經典以及藝術電影,而CGV就特別設有VIP lounge,入場前有個「候戲室」可以坐住等。更加唔排除有人覺得大會堂才是最好的選擇,反正多了兩間新戲院,為澳門市場帶來更多選擇,消費者唔會介意「戰國七雄」的局面,更多消閒好去處就係好事。